Exposición “Pensando cos pés” de Noemí Lorenzo Pérez

Pensando cos pés forma parte dunha mostra máis ampla que Noemí Lorenzo Pérez realizou co patrocinio do Colexio Oficial de Podólogos de Galicia (COPOGA) para conmemorar o seu XX aniversario, e que foi exposta na Galería Sargadelos de Ourense e no MIHL de Lugo no 2017.

A proposta nace a partires do traballo fotográfico de pés nus, libres de todo accesorio.  En palabras da autora: “Quixen facer uns debuxos que nos achegasen directamente a eles, ós pés, sen outra interrupción visual, nun formato próximo ás imaxes xurdidas dun fotomatón. Deste xeito, ademáis de pór en valor as nosas extremidades inferiores, pretendía crear un momento de intimidade entre o público e a peza, tentando provocar unha reflexión no primeiro”.

Posteriormente ás tomas fotográficas realiza apuntes a lapis e vai tirando moldes dos pés a escala real nuns casos en resina de poliéster transparente, noutros en escaiola e resina de poliuretano. Utilizou pintura dourada para xogar coa idea de ouro como valor económico.

Realiza ademais unha serie de debuxos en tinta chinesa sobre papel de poliéster do pé en movemento.

Nesa primeira mostra presentaba unha peza dos seus pés, aberta á colaboración do público, coa intencion de que fora este quen a concluíra. “Eles xeran o ritmo da parte que vai na parede e se prolonga un anaco ó chan, onde debe ser rematada coas pisadas do calzado da xente que visite a sala. Os restos de po que cadaquén trae nos zapatos deixan un rastro de pegadas cun ritmo máis aleatorio, que contrasta coa formalidade da parte suspendida no muro. As luces e sombras xéranse pola mestura de diferentes pisadas con diferente carga matérica, creando cadencias con zonas luz e sombra.”

Nesta ocasión amosa unha selección daquelas pezas: o díptico Con bos pés, realizado en óleo con tinta fluorescente sobre lenzo; unha serie en grafito e lapis acurelable sobre papel de poliéster; e unha colección de pequenas esculturas en resina transparente sobre fondo dourado.

Os pés teñen unha longa tradición simbólica na arte con valores relixiosos, mitolóxicos ou incluso fetichistas, nus ou calzados, son a parte da anatomía que relaciona o mundo inferior (do inframundo) co terrestre. Aquiles tiña un punto débil, o seu talón dereito, polo que o agarrou a súa nai, Tetis, cando o mergullou no lago de Estigia para facelo inmortal; os pés de Hermes ou Mercurio teñen as xa que el é o mensaxeiro dos deuses; os pés de Cristo aparecen nús, e na cruz con cravos representativos da dor; no templo de Éfeso a cabeza de Ártemis aparece xunto á planta dun pé;  Sérapis e Isis tamén teñen a súa iconografía unida aos pés, como outros deuses e deusa exipcios; tamén este extremidade é utilizada en moitos exvotos; temos pegadas na arte rupestre, tanto na Península como en Ibero-América (Cuevas de Oxkutzcab en México, escritura maia, etc.) (Rodríguez Oliva, 1987). Na Biblia os pés teñen gran importancia, Xesús lava os pés aos seus discípulos como vemos tamén en numerosas pinturas renacentistas e barrocas. E xa na arte contemporánea temos os pés das bailarinas de Degás ou os debuxos de Egon Schiele, entre outras obras (Villaverde Solar, 2008).

Noemí Pérez Lorenzo é doutora en Belas Artes pola Universidade de Vigo e titulada no VII Mestrado sobre Obra Gráfica do Centro Internacional para a Estampa Contemporánea (CIEC, Betanzos, A Coruña).Ten realizado numeroas exposicións individuais e colectivas.

Rodríguez Oliva, P. (1987). Representación de pies en el arte antiguo de los territorios malacitanos. Baética: Estudios De Arte, Geografía E Historia, (10), 189-210.

Villaverde Solar, M. D. (2008). La representación de los pies en el arte moderno y contemporáneo: Su valor iconográfico, simbólico y compositivo. Revista Internacional De Ciencias Podológicas, 2(1), 27-38.

Libros de artista de Manuel Silvetre Visa

 

© Xacobe Meléndrez Fassbender

Nas “peceiras de creatividade” da nosa Biblioteca podedes ver ata mediados de novembro a exposición “O libro de artista: espazo de creación plástica” de Manuel Silvetre Visa.

Manuel Silvetre é doutor en Belas artes e catedrático da Facultade de Belas Artes da Universitat Politécnica de Valencia. Ten unha extensa traxectoria no mundo da arte, como pintor e gravador, sendo a súa especialidade a serigrafía. Ten realizadas máis de vinte exposicións individuais tanto en España como fóra do país, así como participado en numerosas mostras colectiva. A súa obra atópase en distintas institucións como as universidades de Chile, Nacional de México, Politécnica de Valencia, Murcia; o Palau de la Música de Valencia, a Biblioteca Nacional, Diputación de Valencia ou Fundación Max Aub, entre outras.

Nesta mostra, Silvestre, nos presenta unha serie de libros de artista traballados con distintas técnicas: collage, serigrafía, xilografía e acrílico, nos que xoga coas letras, as tipografías, descompoñéndoas en formas xeométricas. Noutros dialoga con poetas como Miguel Hernández ou Hans Raimund.

O libro, como espazo de creación para o artista, é un soporte de pequenas dimensións pero cun amplo e denso percorrido. Pola súa estrutura, supón un reto ao ter que representar un conxunto de imaxes fragmentadas polo encadre de cada páxina, e á súa vez, entrelazadas nunha unidade de espazo-tempo. 
O libro nace e medra como un proxecto unitario, como un obxecto concibido e narrado en toda a súa extensión e profundidade. Un territorio onde experimentar con diversos procedementos, un xogo discursivo entre a palabra e a imaxe, establecendo unha particular simbiose entre ambas. 
O pintor e gravador Manuel Silvestre, presenta un conxunto de libros de artista onde a imaxe faise presente en cada unha das páxinas. Case todas pezas únicas nas que intervén co propósito de xerar un discurso formal no que experimenta con elementos gráficos directos: manchas, maculaturas, máscaras, tipografías,  papeis e imaxes recortados e encolados. 
Son obras mudas que transcenden o contido literario  -do mesmo xeito que os poemas visuais de Joan Brossa-  pois van máis aló do simple impacto visual en busca dunha terceira dimensión, o que provoca unha chiscadela gráfica que busca a complicidade do espectador. (Manuel Silvestre)

Espazos da Biblioteca

A Biblioteca conta con varios espazos en libre acceso distribuidos en dous andares. Ademais da sala xeral de consulta e préstamo, e da Hemeroteca (na que podedes consultar as revistas) dispoñemos de pquenos lugares para un traballo máis específico individual ou colectivo:

Sala Elvira Bao e Sala María Barbeito para traballos en grupo. Levan o nome de dúas mestras, innovadoras e defensoras do ensino público. Estes espazos requiren reserva previa no mostrador da entrada. Contan cada unha con 12 postos de traballo. A sala Elvira Bao ten tamén unha parede que se pode utilizar como taboleiro para escribir con xiz, e a sala María Barbeito 4 ordenadores conectados á rede e un escáner.

  • Espazo de cine Chano Piñeiro. Dedicado a un creador de cine que loitou porque o cine galego se realizara na propia lingua e ocupara o lugar que lle corresponde, artista que nos deixou moi novo. Conta cunha colección de material audiovisual variado, no que está a colección de cine, dispoñible para préstamo. Tamén  dispón de catro cabinas para estudo individual.
    Recuncho de lectura Xohana Torres. Un nome para a historia da literatura, mais tamén para a do feminismo e a lingua galega. Ela foi poeta, dramaturga e narradora, e hoxe ten un pequeno lugar na nosa Biblioteca.  Espazo para lectura de lecer, con tranquilidade, e tamén para a realización de actividades culturais organizadas pola Biblioteca e por membros da comunidade universitaria do centro. Conta cun mobiliario cómodo e cálido e cunha pantalla de proxección.

 

Exposición de gravado de Omar Kessel

© Xacobe Meléndrez Fassbender

Dentro das actividades programadas para este trimestre está a exposición de gravado de Omar Kessel, artista cubano que reside actualmente en Galicia. A mostra estará no recuncho de lectura “Xohana Torres” dende finais de setembro.

Omar Kessel é graduado en Belas Artes pola Universidad de La Haba-na, e actualmente é profesor no Centro Internacional da Estampa Contemporánea (CIEC). É mebro da Unión Nacional de Escritores e Artistas de Cuba (UNEAC) e doTaller Experimental de Gráfica da Habana. (TEGH).  En Cuba foi profesor de debuxo e pintura en Matanzas e La Habana. Actualmente imparte tamén cursos no Museo de Belas Artes da Coruña, así como en distintas universidades e institucións académicas. Ten acadado numerosos premios e realizado exposicións individuais en varios países, así como participado en exposicións colectivas internacionais.

Pintura, debuxo, litografía, maneira negra, punta seca, augaforte e augatinta, talla, cerámica… son as artes nas que adoita traballar, creando obras de gran complexidade técnica. Omar é un virtuoso do debuxo, ben en papel ou ben en pedra, madeira ou metal. Nas súas obras predominan as cores cálidas, os ocres nas representacións de campesiños, os vermellos dos cabelos das mulleres, laranxas e amarelos nas froitas tropicais, en moitas ocasións cun forte contraste co azul que emprega nos panos e teas. Plenamente figurativa, a súa obra está dominada polas representacións femininas, que aparecen entre froitas, árbores e animais, núas ou cubertas con delicados veos, coma a deusa creadora e, dadora de vida Yemayá, en ocasións observadas por ollos que esculcan na escuridade, nunha evocación á súa terra natal.  Pero tamén hai referencias na súa obra ás pinturas negras de Goya ou a algúns dos seus gravados, nalgunhas representacións grotescas dos rostros dos vellos, ou nesas esceas entre ensoñacións e maxia. Os títulos das obras tráenos boleros e sons cubanos, que sempre o acompañan mentres debuxa e pinta.

Nesta mostra podemos ver unha pequena selección da súa obra en papel, realizada nos últimos anos.

O mércores 27 de setembro quedou inaugurada a exposición, na que Omar nos achegou ás distintas técnicas de gravado a través da súa obra. Acompañáronnos Roberto Suárez Brandariz e parte do seu alumnado, que tiveron ocasión de coñecer a súa creación mediante un fluído diálogo. Agradecemos a Omar o préstamos das súas obras para que o alumnado universitario poida ter un contacto directo coa arte.

“O poder dos detalles”, de María Berini Pita da Veiga

Durante os meses de maio e xuño podedes visitar no Recuncho de lectura a exposición “O poder dos detalles“, de María Berini Pita da Veiga.

María é licenciada en dereito pola UDC e actualmente está realizando o Grao en Educación Primaria na nosa Facultade. Adestradora de tenis, traballa con colectivos de persoas con discapacidade intelectual e en risco de exclusión social, colaborando tamén como mestra no centro de formación Violetas de Cáritas (A Coruña).

Unha das súas paixóns é a fotografía, á que entrega parte do seu tempo de lecer. Cóntanos ela mesma: “A fotografía é unha afección herdada do meu pai e do meu avó. Estando aínda máis lonxe da profesionalidade, desfruto do proceso de aprendizaxe no que estou somerxida, tratando de mellorar día a día tanto tecnica como artisticamente”. Como xurde esta mostra?, María di que foi algo expontáneo, depois de ollar todas as súas fotografías reparou en que a meirande parte delas eran detalles dun obxecto ou espazo maior, e que nese franmento estaba recollida toda a emoción e expresividade que procuraba.

Nelas podemos facer un percorrido por detalles de Galicia, París, Porto ou Pamplona… Todas tiradas en modo manual e sen apenas retoque dixital.

©María Berini Pita da Veiga

No 2017 acadou o promio do público no V Concurso de Fotografía “Románico Digital”, pola súa obra  “Reflejo de otoño” Monasterio de Melón (Ourense).

Publica na revista en liña cultural A Revolta, na que ten varias entradas sobre Galicia e as súas lendas, con texto e imaxes.

Tamén podedes visitar o seu blogue no que fai reflexións sobre as pertos relacionados coa arte, a cultura e as viaxes, e no qeu hai un enlace que nos leva a algunha das súas imaxes fotográficas.

“Un cuarto de revelado propio”

Durante o mes de marzo pódese visitar no Recuncho de lectura da Biblioteca a exposición “Un cuarto de revelado propio“, de Nina Corredoira. A mostra percorre a vida e obra dalgunhas das mulleres máis salientables na historia da fotografía internacional. A selección, realizada por Nina, abrangue dende o comezo da fotografía ata a época de entreguerras e inclúe a Julia Margaret Cameron, Francis Benjamin Johnson, Gertrude Käsebier, Hanna Höch, Gertrud Arndt, Florence Henri, Lucia Moholy, Grete Stern e Claude Cahun, moitas delas invisibilizadas pola sociedade da época e pola historia da arte contemporánea. Non se trata dunha exposición exhaustiva, as mulleres fotógrafas moitas veces descoñecidas son moitas, e só algunhas pasaron á historia. Tamén reseña ás galegas Cándida Otero, Antonia Santos e María Cecilia Cardarelly Bousquets, tamén esquecidas pola historia. Antonia Santos tivo estudo en Mondoñedo e hoxe é lembrada polas fotografías que realizou sobre o carlismo. De María Cardarelly sábese que montou o seu estudo na casa familiar de Compostela con tan só 19 anos, aínda que actualmente só chegaron tres retratos, un deles de Rosalía de Castro. Polo que se refire a Cándida Otero coñécese que, xunto ao seu home Felipe Prósperi, exerceu como fotógrafa en Vigo, tendo ambos en exclusiva o sistema de positivado “marfilotipia”. O venres, 17 ás 11h, Nina falará sobre todas elas e sobre a pegada tantos anos borrada que deixaron no mundo da arte. Nina Corredoira é alumna na nosa facultade, bolseira na Biblioteca e afeccionada á fotografía, gostando especialmente da realización de retratos.

Paralela á exposición de cartaces pódese ver unha mostra bibliográfica nas vitrinas da biblioteca para achegarmos ao mundo artístico da época na que viviron as nosas protagonistas. Enmárcase dentro das actividades da Biblioteca en conmemoración do día da muller.

Galgo. A beleza da fraxilidade, exposición de Víctor Arufe Giráldez

Galgo. A beleza da fraxilidade,
exposición fotográfica de Víctor Arufe Giráldez.
do 26 de xaneiro ao 28 de febreiro, no Recuncho de lectura da Biblioteca.

“Son as fotografías de Victor Arufe unha documentación sobre a vida dos galgos. Amósanse co carácter didáctico de quen se implica honestamente nun mundo que fai seu e que quere partillar. Tan seu que aparece un certo carácter de humanización dos cánidos a través da técnica do retrato por unha banda, cun esforzo importante en descifrar o xeito de sentir de cada can, e pola outra da reportaxe que quere ensinar o xeito de vida e as relacións cotiás con outros conxéneres. Prescinde intencionadamente da presencia humana, que tan só se adiviña nos reflexos das pupilas e pouco máis, e localiza as súas tomas en contornas naturais onde area e auga centran a interese nos modelos e a súa actividade favorita, a carreira.
Os desenfoques selectivos e a limpeza das imaxes nos achegan aos individuos, mentres que o uso de obxetivos máis longos e as grandes velocidades de obturación que permite as condicións de iluminación (e a tecnoloxía dixital) transmiten todo o dinamismo que os caracteriza. Noutras ocasións apóiase na edición dixital, que lle facilita amosarmos os seus frecuentes momentos de descanso” (Xacobe Meléndrez Fassbender).

A mostra inaugúrase o 26 de xaneiro ás 12.30 no Recuncho de lectura da Biblioteca, onde se poderá visitar ata finais de febreiro.  Contará coa presencia do autor, que virá acompanhado de Khaleessi, a súa galga, nunha proposta educativa de sensibilización de cara á protección e contra o maltrato de galgas e galgos. Tamén nos acompañará unha persoa voluntaria da asciación SOSgalgos, que nos falará da función que eles realizan.

Os galgos son frecuentemente maltratados e abandonados, entre febreiro e xuño un 30% dos animais recollidos por asociacións son galgos. A razón é que moitos cazadores os utilizan e despois, se non obteñen os rendementos esperados e xan non lles son útis, os maltratan, ás veces incluso ata a morte. Trátase dunha práctica moi común, especialmente nalgunhas comunidades como Castilla-La Macha, Castilla-León, Andalucía ou Extremadura, para a que non existe unha protección e seguemento por parte das autoridades, nin hai control das crueldades ás que son sometidos. A asociación SOSgalgos fala na súa web de que cada ano, en España, “ decenas de miles de galgos son aforcados, tirados a pozos e gavias”.

No ámbito profesional, Víctor Arufe é doctor en Ciencias da Actividade Física e o Deporte pola Universidad de A Coruña. É  editor xefe da Revista Científica Sportis Scientific Technical Journal e organiza e participa en numerosos congresos nacionais e internacionais. Ten un blog, “Educación, innovación y empredimiento” no que analiza a situación actual do ensino e publica reflexións persoais sobre aspectos relacionados coa educación, a infancia, as TICs ou deporte.

Concurso “falemos galego nas aulas”: decisón do xurado

Tamara García Ramos

Chisco Babío

Reunido o xurado, composto por Lucía López Ben (alumna de doutoramento), Roberto Suárez Brandariz (profesor de educación artística), Araceli Serantes Pazos (profesora de educación social), Juan José Bueno Aguilar (profesor de educación social) e Inma Doval Porto (bibliotecaria), acordouse por unanimidade, logo de avaliar as 114 participacións:

  1. Conceder os dous premios do concurso “fala galego nas aulas”  a Tamara García Ramos e a Chisco Babío.
  2. Seleccionar10 traballos, no canto de 8, amais dos premiados para a exposición no Recuncho de lectura, os asinados por: Alejandro Lorenzo Miguens, Ana Sánchez Schwellenbach, Andrea Mañana Pallas, Andrés Paolantonio Seijas, Beatriz Lage Vilariño, Carolina Carreira Pacoret,Concepción Freire Lago, Giulia Uccellani, Irene López Martínez e Susana Sanmartín Guillén.
  3. Na valoración o xurado tivo en conta, entre outros aspectos, a calidade técnica, a orixinalidade e a claridade da mensaxe.

A exposición poderá visitarse no Recuncho de lectura dende o día 14 de decembro. Moitas grazas a todas e a todos por participar, e noraboa a seleccionadas e seleccionados.

Presentación do libro Donato, de Héctor Pose Porto

hector-pose-donato-cartace2O día 23 ás 19 horas no Recuncho de lectura teremos a presentación do libro Donato, de Héctor Pose, que estará a cargo do autor e de Donato. O libro, escrito en primeira persoa, relata a vida do xogador do Deportivo, conta cun prólogo de Bebeto e unha “posdata” do autor moi interesante. A presentación coincide coa exposicións  fotográfica Futillos, de Xacobe Meléndrez Fassbender, e cunha mostra bibliográfica das nosas “peceiras de creatividade” ambas de homenaxe a Alexandre de Fisterra, republicano galego exiliado durante a guerra civil española. Alejandro Campos Ramírez (máis coñecido como Alexandre de Fisterra) foi  escritor, editor e creador de numerosas patentes, e entre os seus múltiples inventos está o futbolín.

Falemos galego nas aulas! Concurso de cartaces

nas-aulasen-galego

A nosa Biblioteca en colaboración coa Aula de plástica da Facultade convoca un corcurso de cartaces co obxectivo de promocionar o galego nas aulas. Poderá participar todo o alumnado da Facultade. Un xurado seleccionará 10 cartaces para expoñer no Recuncho de lectura e entre eles elexirá os dous qeu considere mellores para premio.

Participa, aquí podes ler as bases. Lembra tes de prazo ata o 25 de novembro.

O concurso conta co apoio e promoción da CNL e a Comisión de Cultura do centro.